ఒక హౌస్ సర్జన్ మనోవేదన

చిగురించకనే వసివాడిన లేతకొమ్మా!
పాడ్యమి నాడే రాహువు మింగిన చందమామా!


నీ లేలేత గళం నుండి ఏ గానకోకిల ఉద్భవించి,
కమనీయ రాగాలతో ఈ అవనిపై అమృతవర్షం కురిపించేదో....?

నిర్లక్ష్య వైఖరితో, నిరంకుశ కర్కశ పాదాలతో
నీ కంఠం కమిలిపోయేలా కసిగా కాలరాశారు.


నీ మనొగగనం లో ఏ కవికోకిల జనియించి,
అమృత తుల్య రచనలతో పుడమిని పులకరింప చేసేదో.....?


దుర్భేద్య పరిస్థితుల దుర్భర అగాధంలో పడవేసి,
నిరుపేదవన్న నిరాదరణ జ్వాలల్లో త్రోసివేసి,
నీ పుర్రెను పూడ్చివేసారు,
నీ మస్తిష్కాన్ని మసి చేసారు.


తెరువకనే మూసిన ఆ కన్నులనుండి
విశ్వ ప్రేమను చాటే ఏ విశ్వమాత
కారుణ్య భరిత దృక్కులు వెల్లి విరిసేవో.....?

మానవత్వాన్ని మంటగలిపి,
కారుణ్యాన్ని కాల్చివేసి,
ప్రేమను పరిసమాప్తం చేసారు.
అందరి అనాదరణకు నిన్ను ఆహుతి చేసారు.


పురిటిలోనే పుణ్యలోకాలకు చేరిన పుత్తడి బొమ్మా!

కౄరమృగాల మధ్య చిక్కిన లేడిపిల్లలా ..
భయం భయం గా శ్వాసిస్తున్న నీకు,
నా ఊపిరి పంచాలని పలువిధాల ప్రయత్నించానమ్మా..

పుట్టకముందే అనేక అసహాయతలతో అలసిపోయి,
గునపాలు గ్రుచ్చబడ్డ నీ గుండెను
స్పందింప చేయాలని శతధా శ్రమించానమ్మా..

నిన్ను ఏడ్పించి, నీ తల్లిని నవ్వించాలన్న తపనతో ..
నీ పసి దేహాన్ని నిర్దాక్షిణ్యంగా కొట్టానమ్మా..


కానీ......

పాడు బ్రతుకు బ్రతకటం కోసం నిరంతరం మనసుని చంపుకుంటూ..
అనుక్షణం చస్తూ బ్రతికే మీరు ఏడవాలిగానీ నేనెందుకు ఏడ్వటం అనుకున్నావేమో...

పైసల కోసం శిశువుల అశువులు సైతం లెక్క చేయని పశువులున్న
పాపిష్ఠి లోకాన్ని పరిహసిస్తూ పుణ్యలోకాలకు పయనించావు.

జాలిగలవారిపై కూడా జులుం చేసే అధికారుల రాజ్యంలో ,
అసహాయురాలినైన నేను మాత్రం ,
నీ మరణాన్ని ధృవీకరించడం తప్ప మారు మాటాడలేకపోయాను.


గర్భకుహరం నుండే అంతిమ గమ్యం చేరిన చిట్టితల్లీ!

అందరిలాగే తానూ నిన్ను అసహాయంగా వదిలి,
అమ్మ అమృతం అందకుండా అడ్డుపడి,
భగవంతుడు నీకు శాపమే ఇచ్చాడో..?

లేక

కర్కొటకులై క్షణ క్షణం కాలకూటం చిందించే
కర్కశ నాగుల వంటి కౄర మానవుల కబంధహస్తాలనుండి కాపాడి,
కరుణతో తన కడకు చేర్చుకొని,
నీకు కమ్మని వరమే ప్రసాదించాడో..?
ఆ భగవంతుడినే అడుగమ్మా.


పసిపాపకు పాలిస్తానన్న పసిడి కలలతో
ప్రసవ వేదన పడ్డ పిచ్చి తల్లి మరణతుల్య వేదనకు
సార్ధకత్వం చేకూర్చమని చెతులెత్తి ప్రార్ధించినా..
దూరంగా ఉన్నానని నా ప్రార్ధనను పట్టించుకోలేదేమో..?
ఎందుకిలా జరిగిందని
నిన్ను తనలో ఐక్యం చేసుకున్న ఆ భగవంతుని నువ్వైనా నిలదీయమ్మా..


పాపపుణ్యాలెరుగని పసిపాపల గర్భస్థవేదనను
దురంతం చేసే దురాశాపరుల దుష్టత్వాన్నీ,

ప్రత్యక్ష దైవాలైన కన్న తల్లుల ప్రసవవేదనను
నిరర్ధకం చేసే నిర్దయుల నిర్లక్ష్యాన్నీ,

మానవత్వంతో స్పందించే నావంటి వారి మనో వేదనను
అపహాస్యం చేసే అమానుష హృదయుల ఆభిజాత్యాన్నీ..
అంతం చేయమని
ఆ అంతర్యామిని నీవైనా అర్ధించమ్మా...